ឥណ្ឌូនេស៊ី ៖ ក្រុមហ៊ុន KFC នៅឥណ្ឌូនេស៊ី បានរាយការណ៍ពីការខាតបង់សុទ្ធចំនួន ជាង ៣៦លានដុល្លារអាមេរិក គិតត្រឹមត្រីមាសទី៣ នៃឆ្នាំនេះ ដែលបណ្តាលឱ្យក្រុមហ៊ុន បានបិទហាងចំនួន ៤៧និងបញ្ឈប់បុគ្គលិកចំនួន២២៧៤ នាក់។
នៅក្នុងរបាយការណ៍ហិរញ្ញវត្ថុរបស់ខ្លួន ម្ចាស់ KFC Indonesia គឺ Gelael និង Salim Group ក្រោម PT Fast Food Indonesia Tbk (FAST) បានលាតត្រដាងថា ក្នុងរយៈពេលប្រាំបួនខែដំបូងនៃឆ្នាំនេះ ក្រុមហ៊ុនបាន កាត់បន្ថយចំនួនហាងប្រតិបត្តិការរបស់ខ្លួនដល់ ៧១៥ ពីតួលេខឆ្នាំ ២០២៣ដែលមានចំនួន ៧៦២កន្លែង។ កម្លាំងការងាររបស់ខ្លួន ក៏បានថយចុះគួរឱ្យកត់សម្គាល់ផងដែរ ដែលឥឡូវនេះឈរនៅបុគ្គលិកជាង១៣៧០០ នាក់ បើធៀបនឹងជិត ១៦០០០ ពីមុន។
បើតាមការបញ្ជាក់របស់ ម្ចាស់សង្វាក់ផលិតកម្មនេះនិយាយថា នេះជាផលប៉ះពាល់អវិជ្ជមានយូរអង្វែងនៃការរាតត្បាតនៃជំងឺកូវីដ-១៩។ ការងើបឡើងវិញមិនទាន់អាចជួយក្រុមហ៊ុនសម្រេចបាននូវគោលដៅលក់ដែលរំពឹងទុករបស់ខ្លួនទេ ខណៈដែលលក្ខខណ្ឌទីផ្សារកាន់តែយ៉ាប់យ៉ឺន កាន់តែធ្ងន់ធ្ងរឡើងដោយវិបត្តិមជ្ឈឹមបូព៌ាដែលកំពុងបន្ត៕
