ធនាគារជាតិនៃកម្ពុជា ណែនាំដល់ធនាគារទាំងអស់ត្រូវប្រគល់បណ្ណកាន់កាប់អចលនវត្ថុ ទៅអតិថិជនវិញក្រោយសងបំណុលអស់
តាមរយៈសារាចរណ៍របស់ធនាគារជាតិនៃកម្ពុជា ចុះថ្ងៃទី២៣ ខែកញ្ញាកន្លងទៅ បានណែនាំឱ្យ គ្រឹះស្ថានធនាគារ និងហិរញ្ញវត្ថុទាំងអស់ ឱ្យផ្តល់វិញ្ញាបនបត្រសម្គាល់ម្ចាស់អចលនវត្ថុ ឬបណ្ណសម្គាល់សិទ្ធិកាន់កាប់អចលនវត្ថុ ឱ្យ អតិថិជនវិញ ក្រោយការសងបំណុលរួចរាល់ យ៉ាងយូរ៧ថ្ងៃ។ លោកស្រី ជា សិរី អគ្គទេសាភិបាល នៃធនាគារជាតិនៃកម្ពុជា បានគូសបញ្ជាក់បន្ថែមថា៖ «គ្រឹះស្ថានធនាគារ និងហិរញ្ញវត្ថុទាំងអស់(ត្រូវ)ផ្តល់វិញ្ញាបនបត្រសម្គាល់ម្ចាស់អចលនវត្ថុ ឬបណ្ណសម្គាល់សិទ្ធិកាន់កាប់អចលនវត្ថុ ដែលជាទ្រព្យធានានៅ គ្រឹះស្ថានធនាគារ និងហិរញ្ញវត្ថុ និងលិខិតបញ្ជាក់ពីការរួចបំណុល ជូនអតិថិជនក្នុងរយៈពេលយ៉ាងយូរ ០៧ (ប្រាំពីរ)ថ្ងៃ នៃថ្ងៃធ្វើការ បន្ទាប់ពីអតិថិជនបានបំពេញកាតព្វកិច្ចទូទាត់សងឥណទានចប់ជាស្ថាពរ។»។
អគ្គទេសាភិបាល ធនាគារជាតិ នៃកម្ពុជា បញ្ជាក់ថា សារាចរណែនាំនេះ ធ្វើឡើងក្នុងបំណងរួមចំណែកដល់ការរក្សាទំនុកចិត្តរបស់អតិថិជនចំពោះប្រព័ន្ធ ធនាគារទាំងមូល៕
